30 aprel tarixində “Rəqəmsal idarəetmədə süni intellekt” beynəlxalq konfansı çərçivəsində keçirilən data yarışmasının qaliblərinin mükafatlandırılması mərasimi keçirilib. Tədbirdə müxtəlif dövlət qurumlarının və texnologiya şirkətlərinin rəhbərləri iştirak ediblər.

Mükafatlandırma mərasimində data yarışmasında komanda şəklində iştirak edən və qalib gənclər mükafatlandırılıblar. Birinci yerin qalibləri Cəmil Əlizadə, Kamal Ağayev və Mikayıl Yusubov 4 000 AZN, ikinci yerin qalibləri Tərlan Cəbiyev və Turqut Abdullayev 2 000 AZN, üçüncü yerin qalibi Elşən Qədimov 1 000 AZN məbləğində pul mükafatı, sertifikat və hədiyyələrlə təltif olunublar.

Tədbir zamanı yarışmada xüsusi fərqlənən iştirakçılara da sertifikat və hədiyyələr təqdim olunub. EHİM tərəfindən təşkil olunan beynəlxalq konfrans və data yarışması böyük marağa səbəb olub. 22 ölkədən 58 spikerin çıxış etdiyi beynəlxalq konfransa 19 ölkədən 900-ə yaxın unikal iştirakçı qoşulub.

Dünya şöhrətli alim Lütfi Zadənin əziz xatirəsinə həsr olunan beynəlxalq konfrans Bestcomp Group, PAŞA Holdinq, Azərbaycan Beynəlxalq Bankı və bp şirkətinin maliyyə dəstəyi ilə həyata keçirilib.