Bestcomp Group və Sloveniya şirkəti Kontron arasında strateji əməkdaşlıq sazişi imzalanıb

Bestcomp Group ilə Sloveniyanın tanınmış texnoloji şirkəti Kontron arasında əməkdaşlıq sazişi imzalanıb. Saziş Bakı şəhərində keçirilən Azərbaycan–Sloveniya Biznes Forumu çərçivəsində baş tutub.

Bu yeni tərəfdaşlıq Azərbaycan və Sloveniya arasında rəqəmsal inkişafın əsas istiqamətləri üzrə əməkdaşlığı gücləndirmək məqsədi daşıyır. Eyni zamanda, innovasiyanın təşviqi və hər iki ölkədə rəqəmsal transformasiya layihələrinin dəstəklənməsinə xidmət edəcək.

Kontron şirkətinin kommunikasiya həlləri üzrə Satış direktoru Robert Zlatanov bildirib:

“Biz regionun aparıcı sistem inteqratorlarından biri olan Bestcomp Group ilə çərçivə sazişi imzaladıq. Sənəd dəmir yolları, sənaye, neft-qaz və telekommunikasiya sahələri üzrə telekommunikasiya həllərində əməkdaşlığı əhatə edir.” O əlavə edib ki, saziş uzunmüddətli əməkdaşlığı nəzərdə tutur.

Bestcomp Group-un baş icraçı direktoru Fərid Həsənov qeyd edib:

“Kontron ilə əməkdaşlığa başlamaqdan məmnunuq. Bu saziş hər iki ölkə üçün faydalı olacaq qabaqcıl rəqəmsal həllərin həyata keçirilməsi baxımından mühüm addımdır.” O əlavə edib ki, Sloveniya və Azərbaycan arasında geniş spektrdə məhsul və xidmətlərin tətbiqi üçün böyük potensial mövcuddur.

Tərəfdaşlığın əsas məqsədi ağıllı texnologiyalar, İT infrastrukturu və rəqəmsal innovasiyalar sahəsində yeni imkanları araşdırmaqdır. Bu isə tərəflərə sürətlə dəyişən texnologiyalar mühitində rəqabət üstünlüyü qazandıracaq.